Faktaboks

Zinken Hopp
eigentleg Signe Marie Brochmann Hopp
Fødd
9. januar 1905, Ullensvang
Død
3. september 1987, Bergen
Verke
Forfattar og omsetjar
Familie

Foreldre: Styrmann og journalist Diderik Hegermann Brochmann (1879–1955) og Margit Hagen (1896–1962).

Gift 1932 med programsekretær Einar Meidell Hopp (1899–1956).

Syster til Odd Brochmann (1909–92); sonedotter til Bodvar Fredrik Johannes Brochmann (1852–1930; sjå NBL1, bd. 2); brordotter til Georg Brochmann (1894–1952).

Zinken Hopp

Foto 1983. Bilete frå Norsk biografisk leksikon

Zinken Hopp
Av /NTB Scanpix ※.

Zinken Hopp var ein norsk forfattar og omsetjar. Ho vart mest kjend som barnebokforfattar og for sine muntre dikt frå kvardagslivet, men ho skreiv også biografiar, omsette tallrike forteljingar og skodespel og var ein populær kåsør.

Bakgrunn

Signe Marie «Zinken» Brochmann voks opp i ein familie der litterær verksemd stod sentralt. Faren var med og stifta Norsk Styrmandsforening, han var forfattar av både skjønnlitteratur og faktalitteratur, i tillegg til tidsskriftredaktør og pioner i innsamling av norske shanties. Farfaren var prest og litterat, medan farmora omsette mellom anna Conan Doyle til norsk.

Zinken tok examen artium i 1925 og byrja på Statens Håndverks- og Kunstindustriskole i Oslo, men avbraut studiet. Etter diverse arbeidsopphald som guvernante i Storbritannia, Spania og Frankrike og studiereiser, mellom anna til Storbritannia, Danmark, Hellas, Kina og Island, gifte ho seg i 1932 med leiaren for den lokale kringkastinga i Bergen, Einar Meidell Hopp, og busette seg i Bergen.

Forfattarskapen

Zinken Hopp debuterte som forfattar under pikenavnet Z. Brochmann i 1930 med to diktsamlingar, Guvernantevers og Viser fra vidda, pluss ei novelle og eit knippe litterære stilparodiar i Aschehougs årlege humorantologi, Humør 1930. Seinare kom diktsamlingane Kjøkkenvers (1933), – merkelig nok! (1935), Innen 4 vegger (1938) – alle under pseudonymet Zinken. Fram til 1938 gav ho ut fem diktsamlingar, med kvardagsnære og trivielle motiv som utgangspunkt for ei vital livskjensle kombinert med eit stoisk-muntert filosofisk perspektiv. Ho gav også ut ein biografi om Ole Bull og ein om Hanna Winsnes og ein parodi på historiske romanar i form av ei fiktiv slektskrønike. Godt humør kjenneteiknar òg den lett parodiske slektsromanen Dydens belønning (1948).

I 1943 byrja Zinken Hopp å gje ut barnebøker, illustrerte av broren Odd Brochmann, og ho var aktiv som barnebokforfattar livet ut. Frå 1940-åra av omsette ho dessutan ei lang rekkje barne- og ungdomsbøker og gav ut fleire bøker der ho gjenfortalde kjende sagaer og myter for barn og unge.

Hopp var historisk og kulturhistorisk interessert, med eit særleg blikk på folks daglegliv. Hennar mest berømte verk er Trollkrittet, ein original norsk variant av Alice i eventyrland, som er omsett til ei mengd språk og har kome i mange opplag. Denne boka var med på å gje henne eit rykte som norsk nonsens-diktar. Både i sin lyriske og sin prosaiske produksjon er ho ein avbalansert og klar – men innfallsrik og leiken – forteljar. Både som forfattar og som omsetjar blei ho belønna med prisar.

Zinken, ei bok med artiklar om forfattarskapen saman med utvalde tekstar av forfattaren, kom ut i 2005 i samband med hundreårsdagen for fødselen hennar.

Anna engasjement

Frå slutten av 1920-åra til fram mot 1960 leverte Zinken Hopp populariserande artiklar, essay, kåseri, noveller og dikt til aviser, tidsskrift og vekeblad. Ho var medarbeidar i ei rekkje bøker og blei ein rikskjend radiokåsør. Ei tid leverte ho songar på bestilling for eit gratulasjonsbyrå. Ho laga jamvel ein påkosta firmahistorikk om John Griegs boktrykkeri på rim.

I tillegg underviste ho i lengre tid i kunsthistorie ved Kunsthåndverkskolen i Bergen. I 1961 var ho med som deltakar i den fyrste «Kvitt eller dobbelt»-spørjeleikserien i NRK Fjernsynet og vann 10 000 kroner i emnet «Klesdrakter gjennom tidene». For NRK laga ho jamvel høyrespela Ole Bulls teater (1949) og Valse triste (1950).

Utgjevingar

Eit utval

  • Guvernantevers, 1930
  • Viser fra Vidda, 1930
  • Kjøkkenvers, 1933
  • – merkelig nok, 1935
  • Persetorsken (red. sm.m. O. Simonnæs), Bergen 1937
  • Innen fire vegger, 1938
  • Barn og blomster, 1943
  • Et eventyr om Norge, 2 bd. (sm.m. O. Brochmann), 1943–44
  • Hanna Winsnes, 1943
  • Eventyret om Ole Bull, Bergen 1945
  • Da mor var liten, 1945
  • Baktanker med boktanker, Bergen 1946
  • Dydens belønning, Bergen 1948
  • Trollkrittet, Bergen 1948
  • Milla hos moster, Bergen 1951
  • Kong Arthur og ridderne av det runde bord, Bergen 1951
  • Hvem er hvem i kongerekken, Bergen 1957
  • Norwegian Folklore Simplified, Bergen 1959
  • Jon og Sofus, Bergen 1959
  • Kari, 1960
  • Nils, 1961
  • Norwegian History Simplified, 1961
  • Fra Oldmor til tenåring, 1963
  • Arven fra Adamson, 1969
  • Bergens bydeler, Bergen 1970
  • Det gamle Officin, Bergen 1971
  • Boblene, 1973
  • Papegøyen, 1978

Les meir i Store norske leksikon

Eksterne lenker

Litteratur

  • Birkeland, Tone m.fl.: Norsk barnelitteraturhistorie, 2. utg. 2005
  • Lund-Iversen, Carl Lauritz, red.: Zinken : en bok om Zinken Hopp, 2005
  • Stud. 1925, 1950
  • Hvem er hvem, fleire utg. 1955–69
  • K. L. Måge: Hardanger-bibliografi, Øystese 1978
  • Vestlandsdiktarar, 1978
  • Årboka. Litteratur for barn og unge, 2001

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg